2 ვერცხლი და 2 ბრინჯაო – ბერძნულ-რომაული სტილით მოჭიდავეთა ნაკრებმა ევროპირველობაზე გამოსვლა დაასრულა

საქართველოს ბერძნულ-რომაული სტილით მოჭიდავეთა ნაკრებმა, იტალიის დედაქალაქ რომში, ევროპის ჩემპიონატზე გამოსვლა 2 ვერცხლისა და 2 ბრინჯაოს მედლით დაასრულა.

ლადო გეგეშიძის გუნდს ორი ოქროს მედლის მოპოვების შანსი ჰქონდა.

ლევან არაბულს (130კგ) შეეძლო 46 წლიანი ნავსი გაეტეხა და ამ სახეობაში, მძიმე წონაში საქართველოსთვის ოქროს მედალი მოეტანა, თუმცა მან ფინალში ხასიათი ვერ გამოავლინა და ვერცხლს დასჯერდა.

ოქროს ფინალი დათმო ახალგაზრდა ირაკლი (იური) ლომაძემაც, რომელმაც ფინალამდე მსოფლიოს, ევროპისა და ოლიმპიური ჩემპიონები ჩამოიშორა, თუმცა, სამგზის მსოფლიო ჩემპიონთან, გერმანელ შტებლერთან ვერაფერი გააწყო. ლომაძესთვის ეს მეორე ევროპის ჩემპიონატი იყო, კასპიისკში მან ბრინჯაო მოიპოვა, რომში კი – ვერცხლი.

ბრინჯაოს დასჯერდა მსოფლიო ჩემპიონი ნუგზარ წურწუმია (55კგ), რომელსაც ევროპირველობამდე ფეხის ტრავმა აწუხებდა. ხანგრძლივი პაუზის შემდეგ დაბრუნებულმა ამირან შავაძემ (60კგ) კი დაბრუნება ბრინჯაოს მედლით აღნიშნა და მესამე ადგილისთვის ბრძოლაში რუს კონკურენტს აჯობა.

საქართველოს ბერძნულ-რომაული სტილით მოჭიდავეთა ნაკრებმა, გუნდურ ჩათვლაში 82 ქულა მოაგროვა და გამოსვლა მეხუთე ადგილზე დაასრულა.

14 თებერვლიდან, რომის ოლიმპიურ ცენტრში, “მატეო პელიკონეზე” თავისუფალი სტილით მოჭიდავეები გამოვლენ.

  • 72
  •  
  •  
  •  
  •